ଅନ୍ତିମ ରହସ୍ୟ

ପାଦ ଯୋଡିକ ଦେ

ମୁଁ ପୋଛିଦିଏ

ତୁ ମାଡିଥିବା ବିଷାଦ ତକ

କାଢିଦିଏ

ଯନ୍ତ୍ରଣାର କଣ୍ଟାତକ|

ନିରୋଳାପଣର ଦ୍ୱୀପ

ଦେଖାଇ ଦେ

ତୋ ନିର୍ଜନତାର ଉଆସ ଖୋଲ

ମୁଁ ମୋ କୋଳାହଳର

ଗଳି କନ୍ଧି ଖଂଜିଦେବି|

ନେଇଯା ମଲ୍ଲୀ

ତୋ ମନ ମୁତାବକ

ନେ ମହକ

ଦେ ପଳାଶ

ରଂଗ ଦେ

ରଂଗ ନେ|

ତୁ ଥିଲେ

ଦୁଃଖ ସହଜରେ ଧରା ଦିଏ

ପୂର୍ଣ୍ଣିମା ରାତିରେ ଜହ୍ନରୁ

ପୃଥିବୀ ମାରାତ୍ମକ ଦେଖାଯାଏ|

————————-

© ® Rashmi Mohapatra

Leave a Reply

Create your own website, free on WordPress.com.Create your own website.
Start free